KAE-1 Ligaren azken bi estropadetan Donostiarrak oso maila polita erakutsi du, baina bosgarren postuan bukatu du azkenean.
(Argazkia: Mikel Goñi)
Ligan egin duzuenaren zein irakurketa egiten duzu?
Egia esan, oso irregularrak izan gara eta hori emaitzetan nabaritzen da. Zortzigarren postuan geratu gara bi aldiz, tartekoak ere izan ditugu, eta azkeneko estropadetan hirugarren eta bigarren postuetan geratu gara. Esan daiteke nahiko ongi bukatu dugula, eta horrekin geratu beharko gara. Hori bai, orokorrean espero baino okerrago ibili gara.
Barrutik nola bizi izan dituzue emaitzetan izandako gora-behera horiek?
Batzuetan pixka bat galduak ibili gara, erregularitate bat aurkitu ezinik. Entrenatzaileak berak ere, espero baino aldaketa eta proba gehiago egin behar izan ditu traineruaren oreka aurkitu ahal izateko.
Momentu onak eta txarragoak bizi dituzue azkenean, baina Liga bukaera ona izateak lagunduko dizue aurrera begira, ezta?
Zerbait positiboa bilatzekotan hori izan beharko da, azkeneko bi estropadetan ongi ibiltzea lortu dugula, emaitza onekin. Villa de Bilbaon hirugarrenak izan ginen, eta Santoñan bigarrenak. Behintzat hasi ginena baino hobeto bukatu dugu. Taldeak badu sentsazioa Liga hasiera hobea egin ezkero bukaera bestelakoa izango zela.
Edonola, Orio izan da Ligako jaun eta jabe.
Arrauna jarraitzen dugunok bagenekien oso talde ona zuela, fitxaketak egin zituela eta diru mugimendua egon zela. Itxuraz TKEra berriro itzultzeko taldea zen. Hala ere, bandera guztiak irabazi dituen arren, ez da halako alde handiarekin aritu. Meritua du lortu dutenak, ez baita batere erraza, baina aldea ez da sekulakoa izan.
Orioz gain, Santurtzi, Lekittarra eta Busturialdea ibili diren lehen postuetan.
Hasieran, Orio alde batera utzita, Ohorezko Txandan ibili diren beste hiru taldeak guretzako eskuragarriak zirela uste genuen. Ikusi den bezala, irabazteko gaitasuna izango genuke. Kontua da, azkeneko bi estropadak sei traineruko bi txandakoak izan direla, hau da, lehenengo lau taldeen txanda berean lehiatu gara, eta emaitza onenak orduan lortu ditugu. Beraz, beraien txandan ibili izan bagina gauzak hobeto egiteko moduan ibiliko ginela pentsatzeko arrazoiak ditugu.
Denboraldi hasieran igoera lortzeko ‘play off’ean sartzea zen Donostiarraren helburua. Zerk huts egin dizue?
Talde barruan kontu asko aipatzen dira beroan, eta entrenatzaileak ere buelta asko ematen dizkio. Taldea helburu handiekin osatu zen eta emaitzak lortu ez direla ikusita, behin denboraldia bukatuta hausnarketa bat egin beharko da hotzean. Hor ikusi beharko da zer hobetu daitekeen eta zer egin dugun gaizki; aurrera begira, ahal dela gauzak hobeto egiteko. Alderdi askok eragiten dute hobeto edo okerrago ibiltzeko. Ustez talde hobea duzula pentsatu eta gero, trainerua mantsoago ibiltzea ere gertatzen da. Askotan ez dira arrazoiak jakiten.
Zein sentipenekin geratu zara?
Pixka bat etsituta nago. Iaz laugarren postuan geratu ostean, talde hobea osatu genuen, eta pixka bat hobetu ezkero gora egin genezakeen. Azkenean, aurrera egin beharrean, pixka bat atzera egin dugu. Ez dakit gure onena eman dugun Liga guztian zehar.
Liga bukatu duzuen arren, Kontxako Bandera geratzen zaizue. Aurpegi hobearekin aurre egiteko moduan zaudete?
Azken bi asteetako emaitzek poztasuna ekarri digute. Hala ere, badakigu zein den gure postua. Gure borroka, urtean guztian bezalaxe, gure buruaren aurka izango dugu. Hortxe jardun beharko dugu. Denboraldi bukaera ona izan nahi dugu.
Zeintzuk izango dira zure ustez Kontxako Banderako gainontzeko zazpi ontziak?
Itsasoaren egoerak baldintzatuko du zein sartu eta zein kanpoan geratu. TKE Ligako lehenengo sei sailkatuak seguru xamar daudela uste dut, eta postu bat zalantzan dagoela. Ez dakit, itsaso zabalean, ziaboga bakarrarekin eta aurtengo traineru berrien kontuarekin ezustekoren bat edo beste egongo dela uste dut. Agian, bere burua barruan ikusten duen talde horietakoren batek atsekabetuta bukatuko du.
Irutxuloko Hitza, Estitxu Zabala, 2012-08-28
http://irutxulo.hitza.info/2012/08/28/xabier-zabala-ez-dakit-gure-onena-eman-dugun-liga-guztian-zehar/
No hay comentarios:
Publicar un comentario